1985: NACE A RADIO GALEGA

Nas gravacións daquel tempo, pode escoitárseme dando indicativos da “Radio Nacional de Galicia”. Todo o mundo na Radio Galega era consciente de que empezaba un tempo especial.

Eu, que durante moitos anos compaxinei o meu traballo de funcionario con catro horas diarias en Radio Popular de Lugo, traballo na Delegación en Lugo de El Ideal Gallego, e corresponsalías varias, como nesta web pode comprobarse, ao entrar no Concello de Lugo como “Xefe do Staff de Presidencia” do Alcalde Vicente Quiroga, deixei radio e prensa, e cambiei o meu destino como funcionario para a Casa do Concello de Lugo.

Pero en 1985 nace a Radio Galega, e nomean director a José Luís Blanco Campaña, amigo con amizade procedente da realidade dos “Galegos en Catalunya” que proclamou o escritor paradelense Manuel Rodríguez López.

Convidoume Blanco Campaña a que colaborase na espléndida realidade dunha Radio Galega e en galego, e afrontei organizar en solitario (nunca tiven un equipo organizador) A FESTA DOS SÁBADOS: catro horas en directo nas tardes dos sábados: A primeira, "A radio máis nova", nenos de colexios facendo o seu programa de radio; a segunda, "Galicia pobo a pobo", conversas con alcaldes galegos que nos falaban dos seus concellos; a terceira, "Literatura Viva", con poetas cos que conversaba e lían anacos da súa obra; e a cuarta, “Amigos”, conversas a tumba aberta coa xente máis relevante da política ou da sociedade galegas.

Todo isto, en directo, organizado a golpe de teléfono por min, viaxando desde Lugo para facer o programa, que se ía cumprindo con precisión milimétrica ou case, cunha única excepción do día no que un accidente me impediu chegar a Compostela.

A miña teima de gardar toda gravación importante, e ter falado para a radio con tanta xente con tanto que dicir, fai que hoxe posúa un arquivo entendo que valioso, que aquí se vai poñendo ao dispor de todos os galegos.

Despois da etapa de Xosé Lois Blanco, foi director outro amigo e compañeiro de Radio Popular, Xerardo Rodríguez, ás ordes do que desenvolvín campañas de radio viaxeira, tanto visitando colexios para que os rapaces fixesen os seus programas de radio, como programas por pobos de Galicia -"Galicia, vila a vila"- con actuacións en directo e conversas, sempre organizando en solitario cousa que hoxe semella verdadeiramente imposible. O certo é que eu procedía dunha radio “pequena”, onde todos debiamos saber facer de case todo, e o sistema que hoxe parece ben primitivo, funcionou e permite mirar cara atrás con asombro e nostalxia.

A RADIO MÁIS NOVA - SEGUNDA ETAPA

Compañía de María de Lugo
Colexio Castrelos
Colexio Lagoas Ourense
Colexio Pablo VI A Rúa
Colexio Abelendo Moaña
Instituto de Redondela
Colexio As Pontes
Colexio n2 Melide
Colexio Mondariz
Colexio Virxe Corpiño Begonte
Colexio Xove
Colexio Palmeiro
Colexio Ramón de Artaza Muros
Colexio Cervantes
Colexio Guitiriz
Colexio Brión
Colexio A Pontenova
Colexio Sagrada Familia A Coruña
Colexio Obradoiro A Coruña
Colexio Guerra Campos Bertamirán Ames
Colexio Lasalle Santiago
Colexio Divina Pastora Lugo